Тайваниас Монгол Улсад суугаа төлөөлөгч Грэйс Ж.Р.Лүө 10-р сарын 17-ны өдөр Тайваний “Юнисон эрүүл мэндийн групп”, “Шинжуан ХХК”, Монгол Улсын “Түвшин Энэрэл” ХХК-аас нийлүүлсэн Тайваний “Шиньдун биотехнологи ХХК”-д үйлдвэрлэсэн 600 тун элэгний үйл ажиллагаа дэмжих Лифарген тарилга (Liphargen Injection)-ыг МУ-ын Сэргээн засах төв эмнэлэг болон Сонгинохайрхан дүүргийн нэгдсэн эмнэлэгт хандивлаж, Тайваньчуудын халуун сэтгэл, анхаарал халамжийг Монгол орны ард иргэдэд түгээв.
Сэргээн засах төв эмнэлгийн захирал Б.Өнөрбилэг хэлсэн үгэндээ “Тайваниас Монгол Улсад суугаа төлөөлөгчийн газар энэ оны 4-р сард тэргэнцэр болон эмнэлгийн хэрэгсэл хандивлаж, 9-р сард Тайваний Цэргийн нэгдсэн гуравдугаар эмнэлгийг манай төвтэй холбон, хамтран ажиллах боломж олгосон явдалд дахин талархал илэрхийлж байна. Бид энэ удаад хандивын шугамаар хүлээн авсан элэгний үйл ажиллагааг дэмжих лифарген тарилгыг маш үр дүнтэйгээр захиран зарцуулахыг хичээн ажиллах болно.” гэв.
Сонгинохайрхан дүүргийн нэгдсэн эмнэлгийн захирал Ц.Олонбаяр хэлсэн үгэндээ “Тайваниас Монгол Улсад суугаа төлөөлөгчийн газрын дэмжлэгтэйгээр Тайваний Ван Фан эмнэлэгтэй холбоо харилцаа тогтоож, энэ сарын эхээр тус эмнэлэгтэй хамтран ажиллах санамж бичиг байгуулсанд бид нэн талархаж байна. Энэхүү хамтын ажиллагаагаар дамжуулан эмнэлгийн үйлчилгээний чанарыг дээшлүүлэн, илүү олон Монгол орны иргэдэд хилийн дээс алхалгүй, Тайваньтай адил түвшний өндөр чанартай эмнэлгийн тусламж авах боломжоор хангана гэж найдаж байна.” гэв.
Тайваниас Монгол Улсад суугаа төлөөлөгч Грэйс Ж.Р.Лүө хэлсэн үгэндээ “Тайваньд үйлдвэрлэсэн эм бэлдмэл маш чанартай, олон улсад чанарын үзүүлэлтээр тэргүүлэх байранд бичигддэг. Тайваний бүхий л эмийн үйлдвэрүүд PIC/S Good Manufacturing Process (GMP) болон Good Delivery Process (GDP) олон улсын стандартыг дагаж мөрддөг. Тайвань бол Олон улсын эмийн зохицуулалтын нийгэмлэгийн хяналтад Европын холбоо, Япон, Канад, АНУ, Швейцартай хамтран оролцдог 6 дахь орон юм.” гэв.
Тэрээр цааш хэлсэн үгэндээ “Энэ онд төлөөлөгчийн газар байгуулагдсаны 20 жилийн ой тохиож байгаа бөгөөд өнгөрсөн 20 жилийн хугацаанд Тайвань Монгол хоёр орон эрүүл мэндийн салбарт ойр нягт харилцан, хамтын ажиллагаа өрнүүлсээр ирсэн. Өнгөрсөн хугацаанд Тайваний зүгээс 1000 гаруй монгол орны эмч эмнэлгийн мэргэжилтэнг урт богино хугацааны сургалт семинарт хамруулаад байгаа төдийгүй эмнэлгийн тоног төхөөрөмж, эмнэлгийн хэрэгсэл хандивласаар ирсэн. Үүний зэрэгцээ Тайваньчууд эрүүл мэндийн салбарын туршлага болон цар тахлаас урьдчилан сэргийлэх туршлагаас хуваалцсаар ирсэн. Манай төлөөлөгчийн газар цаашид ч Тайвань Монголын эрүүл мэндийн салбарын хамтын ажиллагааг үргэлжлүүлэн хөгжүүлж, “Тайвань тусалж чадна, Тайван тусалж байна” гэсэн үзэл санааг түгээсээр байх болно.” гэв.
